BBA//Fjeldco veitti íslenska ríkinu ráðgjöf við sölu á 45,2% hlut í Íslandsbanka.

Almennt hlutafjárútboð á 20% hlut í Íslandsbanka hófst þann 13. maí síðastliðinn og lauk þann 15. maí 2025. Með sölunni losaði ríkið að fullu um hlut sinn í bankanum og var söluverðið 90,5 milljarðar króna en heildareftirspurn nam 190 milljörðum króna.

Þátttaka almennings í útboðinu var fordæmalaus og var útboðið stækkað til að mæta eftirspurn. Rúmlega 31.000 almennir fjárfestar buðu samtals 88,2 milljarða króna í tilboðsbók A, sem var eingöngu ætluð einstaklingum. Þessir fjárfestar fengu forgangsúthlutun án skerðingar og stóðu fyrir um 97,4% af heildarvirði útboðsins.

Útboðsgengi tilboðsbókar A var 106,56 krónur á hlut, sem miðaðist við meðalverð hlutabréfa í bankanum síðustu 15 daga fyrir birtingu útboðslýsingar, eða síðasta dagslokagengi, með allt að 5% afslætti. Verð fyrir fagfjárfesta (bækur B og C) var ákveðið með uppboði, þar sem lágmarksverð yrði aldrei lægra en verð bókar A.

Útboðið er stærsta eignasala ríkissjóðs frá upphafi og heildarsöluandvirði bankans nam 224,7 milljörðum króna þegar fyrri útboð á 35% hlut í júní 2021 fyrir 55,3 milljarða króna og 22,5% hlut í mars 2022 fyrir 52,7 milljarða króna eru tekin með.

BBA//Fjeldco teymið samanstóð af Einari Baldvini Árnasyni, Jóhanni Magnúsi Jóhannssyni, Söru Sigurjónsdóttur, Sigvalda Fannari Jónssyni og Öglu Eir Vilhjálmsdóttur, en stofan veitti aðstoð við samningaviðræður við umsjónaraðila sölunnar ásamt gerð útboðslýsingar og annarra gagna og veitti aðra lögfræðiráðgjöf í útboðinu.

Stofan óskar fjármála- og efnahagsráðuneytinu til hamingju með vel heppnað og sögulegt útboð. Einnig þakkar BBA//Fjeldco ráðuneytinu, Íslandsbanka, Landsbankanum og Milbank LLP fyrir gott og árangursríkt samstarf.